هل لديك جدول يومي ؟!

لو مش عند حضرتك جدول يومي يبقى أكيد فاتك كتير . لأن ده شيء أولي بنعرف بيه الإنسان الواعي من الإنسان غير الواعي .

بنقول : إنسان واعي لأن الوعي أول مستويات التحرك نحو النجاح . والإنسان الواعي عنده خطة واضحة على قدر وعيه . ممكن يتعثر فيها كتير . لكنه بيقوم ويحاول ويعدل ومش بيسمح لنفسه تصاب بالإحباط. أبدا…

قبل ما تنام . هات ورقة وقلم . واكتب الأنشطة الي حابب تعملها في اليوم التالي . دي بيسموها To do list .

ابدأ يومك بدري . وابدأ نفذ جدولك ببساطة . وبدون أي ضغط على نفسك . لأن المستهدف في المرحلة الأولى مش الإنجاز . المستهدف إن حضرتك تكتسب مهارة تنظيم الوقت . وتبدأ تتحكم في وقتك .

اعمل فترات ليومك . ممكن تخلي محورها هو الصلوات الخمس . وده أسلوب جميل ومفيد . بمعنى تقسم اليوم خمس فترات . كل فترة تبدأ بصلاة .

ممكن تقسم يومك ٤ أقسام . كل قسم ٦ ساعات.

قسم كل يوم على حسب طبيعته . يعني مش لازم نفس الروتين لكل يوم . ده مش مطلوب لأنه يسبب ملل . وده ضد الاستمرارية.

اعمل ليوم العمل جدول . وليوم الراحة جدول . واليوم الي فيه ظروف سفر أو مناسبات جدول . المهم أنك متنامش إلا وانت عامل جدول اليوم الجاي على حسب طبيعته .

بعد فترة هتلاقي نفسك بقيت متحكم في وقتك بشكل كويس جدا . لما تلاقي ده حصل تبدأ تحط لنفسك خطة وأهداف كبيرة . شهرية مثلا . وتقسمها على أسابيع .

التدرج ده هيخليك بعد ما كنت بتختبر نفسك وبتحاسبها على تنظيم الوقت هيخليك تحاسب نفسك على الإنجاز والأشواط الي قطعتها في أهدافك .

ده بالنسبة للجدول كجدول . وهنتكلم بعد كده عن توزيع الأنشطة . وايه هي الأنشطة المهمة في حياتنا. أو الي المفروض تكون في حياتنا . وهكذا .